ພິທີເປີດງານວາງສະແດງສິນຄ້າ ມິນິໄທແລນດ໌ວີກ 2020 ຈັດຂື້ນໃນລະຫວ່າງວັນທີ 5-9 ກຸມພາ 2020 ທີ່ເດີນສະໂມສອນແຂວງຫຼວງນໍ້າທາ

ງານວາງສະແດງດັ່ງກ່າວຈັດຂຶ້ນພາຍໃຕ້ການຮ່ວມມືລະຫວ່າງກົມສົ່ງເສີມການຄ້າ ລະຫວ່າງປະເທດ ກະຊ່ວງພານິດໄທ ໃນການສ້າງຄວາມຮ່ວມມືທາງດ້ານການຄ້າ ແລະ ການລົງທຶນ ໃນກຸ່ມປະເທດສະມາຊິກອາຊີ, ງານວາງສະແດງສິນຄ້າ ມິນິໄທແລນດ໌ວີກ ໃນພື້ນທີ່ຕ່າງແຂວງໃນ ສປປ ລາວ ເປັນກິດຈະກຳ ທີ່ໄດ້ດໍາເນີນການມາແລ້ວ ເປັນປີທີ່ 5 ໂດຍໄດ້ມີການຈັດງານໄປແລ້ວ ທີ່ແຂວງ ຈໍາປາສັກ, ແຂວງຫຼວງພະບາງ, ແຂວງວຽງຈັນ, ແຂວງຄໍາມ່ວນ ແຂວງຊຽງຂວາງ,  ແຂວງ ອຸດົມໄຊ ແລະ ແຂວງຫຼວງນ້ຳທາ.

ສໍາລັບງານວາງສະແດງສິນຄ້າ ມິນິໄທແລນດ໌ວີກ 2020 ທີ່ແຂວງຫຼວງນ້ຳທາ ໃນຄັ້ງນີ້ຈັດຂື້ນໃນລະຫວ່າງວັນທີ 5-9 ກຸມພາ 2020 ຕັ້ງແຕ່ເວລາ 10.00-21.00 ໂມງ ທີ່ເດີີ່ນສະໂມສອນແຂວງຫຼວງນໍ້າທາ, ໃຫ້ກຽດເຂົ້າຮ່ວມພິທີເປີດງານວາງສະແດງດັ່ງກ່າວ ໂດຍ ທ່ານ ດຳຣົງ ໃຄຣ່ຄຣວນ ເອກອັກຄະຣາດຊະທູດແຫ່ງຣາດຊະອານາຈັກໄທ ປະຈຳ ສປປ ລາວ,  ທ່ານ ຄຳໄຫລ ສີປະເສີດ ຮອງເຈົ້າແຂວງໆຫລວງນ້ຳທາ, ທ່ານ ນ  ຈັນທະຈອນ ວົງໄຊ ຮອງປະທານສະພາການຄ້າ ແລະ ອຸດສາຫະກຳແຫ່ງຊາດລາວ, ທ່ານ ນ ປະວິດຕາ ມ່ວງສະກຸນ ຜູ້ຊ່ວຍທູດ ທີ່ປືກສາຝ່າຍການຄ້າ ສະຖານເອກອັກຄະຣາຊະທູດໄທ ປະຈຳນະຄອນຫລວງວຽງຈັນ, ຕາງໜ້າຈາກກົມສົ່ງເສີມການຄ້າ ກະຊວງອຸດສາຫະກຳ ແລະ ການຄ້າ, ບັນດາທ່ານຜູ້ຕາງໜ້າພະແນກອຸດສາຫະກຳ ແລະ ການຄ້າແຂວງພາກເໜືອ ແລະ ບັນດາຫົວໜ່ວຍທຸລະກິດກໍ່ໃຫ້ກຽດເຂົ້າຮ່ວມຢ່າງພ້ອມໜ້າ.

ງານວາງສະແດງສິນຄ້າ ມິນິໄທແລນດ໌ວີກ 2020 ທີ່ແຂວງຫຼວງນ້ຳທາ ໃນຄັ້ງນີ້ມີຜູ້ເຂົ້າຮ່ວມທັງໝົດ ຈຳນວນ 48 ບໍລິສັດ 61 ຮ້ານຄ້າ, ເຊິ່ງເປັນຜູ້ຜະລິດຈາກປະເທດໄທໃນ ສປປ ລາວ ຈຳນວນ 22 ບໍລິສັດ 24 ຮ້ານຄ້າ ແລະ ບໍລິສັດຕົວແທນຈຳໜ່າຍສິນຄ້າໄທ ໃນ ສປປ ລາວ ຈຳນວນ 16 ບໍລິສັດ 27 ຮ້ານຄ້າ, ປະກອບດ້ວຍສິນຄ້າ ອາຫານແລະ ເຄື່ອງດື່ມ ຜະລິດຕະພັນເພື່ອສຸຂະພາບ ແລະ ຄວາມງາມ ສິນຄ້າແຟຊັ່ນ ແລະ ເຄື່ອງໃຊ້ພາຍໃນເຮືອນ ແລະ ການວາງສະແດງສິນຄ້າ ODOP ຂອງຜູ້ປະກອບການໃນແຂວງຫຼວງນໍ້າທາ ແລະ ພື້ນທີ່ອ້ອມຂ້າງໂດຍການສະໜັບສະໜູນຂອງໜ່ວຍງານຂອງພາກລັດຂອງ ສປປ ລາວ ເພື່ອຂະຫຍາຍໂອກາດທາງ ດ້ານການຄ້າ ແລະ ສ້າງເຄືອຂ່າຍທຸລະກິດລະຫວ່າງຜູ້ປະກອບການໄທ ຜູ້ປະກອບການລາວ ແລະ ປະຊາຊົນລາວ ໄດ້ມີໂອກາດເລືອກຊື້ສິນຄ້າທີ່ມີຄວາມຫຼາກຫຼາຍຈາກຜູ້ປະກອບການທັງສອງປະເທດ  ພ້ອມທັງມີການຈັດກິດຈະກໍາຄວບຄູ່ກັບການຈັດຈໍາໜ່າຍ ສິນຄ້າ ເຊັ່ນ ການປະກວດເດີນແບບຊຸດພື້ນເມືອງຊົນເຜົ່າ ການປະກວດຮ້ອງເພງ ການປະກວດ Mini Thailand Got Talent Kid ແລະ ການປະກວດ Mini Thailand Dance Talent ຕະຫຼອດໄລຍະເວລາ 5 ມື້.