ພິທີເປີດງານຕະຫຼາດນັດ ສິນຄ້າກະສິກຳອິນຊີ

ຕອນເຊົ້າເວລາ 6:30 ໂມງ, ວັນທີ 30 ພະຈິກ 2019, ທີ່ເດີ່ນສູນການຄ້າລາວ-ໄອເຕັກ ໄດ້ມີພິທີເປີດງານຕະຫຼາດນັດ ຜົນຜະລິດກະສິກຳ, ສິນຄ້າ ODOP ຂອງຄອບຄົວຕົວແບບ 9 ຕົວເມືອງ ໃນນະຄອນຫຼວງວຽງຈັນ, ເພື່ອຄໍານັບຮັບຕ້ອນ ກອງປະຊຸມສະໄໝສາມັນເທື່ອທີ່ 8 ຂອງສະພາແຫ່ງຊາດຊຸດທີ່ VIII  ແລະ ທັງເປັນການຂໍ່ານັບຮັບຕ້ອນວັນຊາດທີ 2 ທັນວາ ຄົບຮອບ 44ປີ. ໂດຍການເຂົ້າຮ່ວມຂອງ ທ່ານ ສົມຈິດ ອິນທະມິດ ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ, ທ່ານ ພວງປະຣິສັກ ປຣະວົງວຽງຄຳ ຮອງລັດຖະມົນຕີ ກະຊວງກະສິກຳ ແລະ ປ່າໄມ້, ທ່ານ ອາດສະພັງທອງ ສີພັນດອນ ຮອງເຈົ້າຄອງນະຄອນຫຼວງວຽງຈັນ, ພ້ອມດ້ວຍພາກສ່ວນກ່ຽວຂ້ອງຕ່າງໆກໍ່ເຂົ້າຮ່ວມ.

ທ່ານ ອາດສະພັງທອງ ສີພັນດອນ ໄດ້ກ່າວວ່າ: ຈຸດປະສົງຂອງການຈັດງານໃນຄັ້ງນີ້ ເພື່ອຈັດຕັ້ງຜັນຂະຫຍາຍຂໍ້ຕົກລົງຂອງທ່ານນາຍົກລັດຖະມົນຕີ ໃນການສົ່ງເສີມຜະລິດຕະພັນພາຍໃນ, ເພື່ອເປັນການສ້າງຂະບວນການ ປູກຈິດສຳນຶກໃຫ້ປະຊາຊົນຫັນມາຊົມໃຊ້ສິນຄ້າທີ່ຄົນລາວຜະລິດພາຍໃນປະເທດຫຼາຍຂຶ້ນ,​ ເພື່ອສົ່ງເສີມການຜະລິດພາຍໃນໃຫ້ມີບ່ອນຈຳໜ່າຍສິນຄ້າ, ເພື່ອຮັບຮູ້ໄດ້ຜົນການຜະລິດ ທີ່ສາມາດຜະລິດ ແລະ ສະໜອງຢູ່ພາຍໃນ ແລະ ສ້າງເງື່ອນໄຂອຳນວຍຄວາມສະດວກແກ່ຜູ້ຜະລິດ ແລະ ຜູ້ຊົມໃຊ້ໄດ້ມີການພົບປະແລກປ່ຽນຂໍ້ມູນຮ່ວມກັນ.ສຳລັບສິນຄ້າ ທີ່ນຳມາວາງສະແດງພາຍໃນງານຈະປະກອບມີ ຜັກອີນຊີ, ສິນຄ້າໂອດ໋ອບ, ສິນຄ້າອຸດສາຫະກຳປຸງແຕ່ງ ແລະ ສິນຄ້າຄອບຄົວຕົວແບບທີ່ມາຈາກ 9 ຕົວເມືອງທົ່ວນະຄອນຫຼວງວຽງຈັນ, ທັງໝົດຫຼາຍກວ່າ 300 ຫົວໜ່ວຍທຸລະກິດ.

ຂໍເຊີນຊວນບັນດາທ່ານຮ່ວມຊົມ ແລະ ຮ່ວມຊື້ສິນຄ້າພາຍງານຕະຫຼາດນັດຜົນຜະລິດກະສິກຳອິນຊີ, ສິນຄ້າໂອດ໊ອບ, ຄອບຄົວຕົວແບບ 9 ຕົວເມືອງໃນນະຄອນຫຼວງວຽງຈັນ ເຊິ່ງຈະດໍາເນີນເປັນເວລາ 2 ວັນ, ນັບແຕ່ວັນທີ 30 ພະຈິກ ຫາ ວັນທີ 1 ທັນວາ 2019 ນີ້ ເດີ່ນສູນການຄ້າລາວ-ໄອເຕັກ, ເມືອງໄຊເສດຖາ, ນະຄອນຫຼວງວຽງຈັນ.