ງານຖະແຫລງຂ່າວ Vientiane Motor show 2020

ໃນວັນທີ 0​7 ກຸມພາ 2020 ກົມ​ສົ່ງ​ເສີມ​ການ​ຄ້າ ກະຊວງອຸດສາຫະກຳ ແລະ ການຄ້າ ຮ່ວມກັບ ບໍລິສັດ ພີພີ ໄຊໂຍເອັນເຕີເທັນເມັນ ແອນອີ​ເວັນອໍກາໄນເຊີ ຈໍາກັດຜູ້ດຽວ ໄດ້ຈັດງານຖະແຫລງຂ່າວຂື້ນທີ່ໂຮງແຮມ ເດີທາດຫຼວງ ດຼໍ ພາຍໃຕ້ຫົວຂໍ້ ”ງານວາງ​ສະ​ແດງ​ລົດ​ນາ​ນາ​ຊາດ​ວຽງ​ຈັນ Vientiane  Motor show 2020”

 

ເປົ້າ​ໝາຍ​ຫລັກ​ຂອງ​ງານວາງ​ສະ​ແດງ​ໃນ​ຄັ້ງ​ນີ້ ກໍ່​ເພື່ອ​ສ້າງ​ໂອ​ກາດ​ໃຫ້​ກັບ​ຄ້າຍ​ລົດ​ຕ່າງໆ​ເພື່ອ​ເຮັດ​ການ​ສົ່ງ​ເສີມ​ການ​ຂາຍ​ລົດ​ດ້ວຍ​ຮູບ​ການ​ທີ່​ແຕກ​ຕ່າງ​ກັນ, ອີກ​ດ້ານ​ໜຶ່ງກໍ່​ຍັງ​ສ້າງ​ເງື່ອນ​ໄຂ​ໃຫ້​ແກ່​ຜູ້​ຊື້​ສາ​ມາດ​ເຂົ້າ​ມາ​ທ່ຽວ​ຊົມ ແລະ ເລືອກ​ຊື້​ລົດ​ຍີ່​ຫໍ້​ທີ່​ຕົນ​ເອງ​ມັກ​ຢູ່​ສະ​ຖານ​ທີ່​ດຽວ​ກັນ​ຢ່າງ​ສະ​ດວກ​ມີ​ຫລາຍ​ທາງ​ເລືອກ​ໃຫ້​ຕັດ​ສິນ​ໃຈ​ຕາມ​ແຕ່​ລະ​ເງື່ອນ​ໄຂ​ຂອງ​ຄ້າຍ​ລົດ​ທີ່​ເຂົ້າ​ຮ່ວມ​ງານ, ພ້ອມ​ດຽວ​ກັນ​ນີ້​ການ​ຈັດ​ງານ​ດັ່ງ​ກ່າວກໍ່​ຍັງ​ເປັນ​ການ​ກະ​ຕຸ້ນ​ການ​ແຂ່ງ​ຂັນ​ທາງ​ດ້ານ​ການ​ຄ້າ ແລະ ຈະເຮັດໃຫ້ເສດ​ຖະ​ກິດ​ຂອງ​ຊາດ​​ມີການຂະຫຍາຍຕົວດີຂື້ນ.

​ການຈັດ​ງານ​ວາງສະ​ແດງ​ລົດນາ​ນາ​ຊາດ ​ວຽງ​ຈັນ ປະ​ຈຳປີ 2020​ ຖື​ໄດ້​ວ່າ​​ເປັນ​ງານ​ທີ່​​ຍິ່ງໃຫຍ່ ທີ່​ໄດ້​ຮັບ​ຄວາມ​ສົນ​ໃຈ​ຈາກ​ສັງ​ຄົມ​ພາຍ​ໃນ ແລະ ຕ່າງ​ປະ​ເທດ ເພາະພາຍໃນງານ​ໄດ້ມີການວາງສະແດງຜະລິດຕະພັນຕ່າງໆທີ່​ຕິດ​ພັນ​ກັບ​ລົດທີ່​ເປັນເທັກໂນໂລຊີໃໝ່ໆ ​ແລະ ລົດຍີ່​ຫໍ້​ຕ່າງໆ​ທີ່ມາຈາກປະເທດ​ອ້ອມ​ຂ້າງອາຊຽນເຂົ້າຮ່ວມ. ພ້ອມ​ດຽວ​ກັນ​ນີ້ ການ​ຈັດ​ງານ​ດັ່ງ​ກ່າວ ກໍ່​ເປັນ​ກົນ​ໄກ​ໜຶ່ງ​ທີ່​​ສຳ​ຄັນ​ໃນການ​ສົ່ງ​ເສີມ​​ການ​ຄ້າ ເພື່ອ​ກະ​ຕຸ້ນ​ເສດ​ຖະ​ກິດ, ດຶງ​ດູດ​ການ​ຄ້າ ແລະ ການ​ລົງ​ທຶນ​ຂອງ​ນັກ​ທຸ​ລະ​ກິດ​ຂອງ​ລາວ ແລະ ຕ່າງປະເທດໃຫ້​ນັບ​ມື້​ເຂັ້ມ​ແຂງ​ຕາມ​ຍຸກ​ເຊື່ອມ​ໂຍງ​ກັບ​ສາ​ກົນ, ທັງ​ເປັນ​ການສ້າງ​​ເວ​ທີໃຫ້​ແກ່​ຜູ້​ຊື້ ແລະ ຜູ້​ຂາຍ​ໄດ້​ພົບ​ກັນ.

ພາຍ​ໃນ​ງານ​ທ່ານ​ຈະ​ໄດ້​ພົບກັບຫຼາຍໆຄ້າຍລົດທີ່ນໍາເອົາລົດທຸກປະເພດ, ອຸປະກອບຮັບໃຊ້ ການຜະລິດກະສິກຳ, ລົດຮັບໃຊ້ອຸດສາຫະກຳ ແລະ ປະເພດລົດຮັບໃຊ້ຄົວເຮືອນ ເພື່ອໃຫ້ຜຸ້ຊົມໃຊ້ ສາມາດເລືອກຊົມ ແລະ ຊື້ໄດ້ໃນຫລາຍເງື່ອນໄຂ. ພິເສດໃນງານຄັ້ງນີ້ ຈະໄດ້ສ້າງຄວາມແຕກ ຕ່າງຈາກປີຜ່ານມາ ເມື່ອທ່ານຈອງລົດພາຍໃນງານໂດຍຜ່ານທະນາຄານກຸງສີລິບຊິ້ງ ທ່ານມີສິດລຸ້ນຮັບລາງວັນ ລວມມູນຄ່າ ຫລາຍກວ່າ 125.000.000 ກີບ, ນອກນັ້ນຍັງມີແພດປະຈຳສະໝາມ ເພື່ອບໍລິການກວດກາຄວາມປອດໄພ, ການປ້ອງກັນພະຍາດທີ່ກຳລັງລະບາດ ເພື່ອສ້າງຄວາມໝັ້ນໃຈໃຫ້ຜູ້ມາທ່ຽວຊົມງານວາງສະແດງໄດ້ມີຄວາມໝັ້ນໃຈຫລາຍຂື້ນ.

ງານ​ວາງ​ສະ​ແດງ​ລົດນາ​ນາ​ຊາດ​ວຽງ​ຈັນ Vientiane ​Motor show 2020

ຈະເລີ້ມຂື້ນລະຫວ່າງວັນທີ 22/02 – 02/03/2020

ສະ​ຖານ​ທີ່​ຈັດ​ງານ: ສູນ​ການ​ຄ້າ​ລາວ – ໄອ​ເຕັກ (ຕຶກ​ເກົ່າ)ນະ​ຄອນ​ຫວງວຽງຈັນ