ກອງປະຊຸມສໍາມະນາໃນຫົວຂໍ້ “ສົ່ງເສີມການພັດທະນາຍີ່ຫໍ້ສິນຄ້າລາວ”

ໃນວັນທີ 12 ທັນວາ 2019 ກົມສົ່ງເສີມການຄ້າ, ກະຊວງອຸດສາຫະກໍາ ແລະ ການຄ້າ ຮ່ວມກັບ ພະແນກອຸດສາຫະກໍາ ແລະ ການຄ້າ ແຂວງຫຼວງພະບາງ ໄດ້ຈັດກອງປະຊຸມສໍາມະນາໃນຫົວຂໍ້ “ສົ່ງເສີມການພັດທະນາຍີ້ຫໍ້ສິນຄ້າລາວ” ພາຍໃຕ້ການສະໜັບສະໜູນງົບປະມານຈາກສູນອາຊຽນ-ຍີ່ປຸ່ນ (AJC). ໃຫ້ກຽດເປັນປະທານເປີດ ກອງປະຊຸມໂດຍ ທ່ານ ຈັນສະໝອນ ສີສະອາດ ຮອງຫົວໜ້າກົມສົ່ງເສີມການຄ້າ ແລະ ທ່ານ ຄໍາຕັນ ສົມພັນວິໄລ ຮອງຫົວໜ້າພະແນກອຸດສາຫະກໍາ ແລະ ການຄ້າ ແຂວງຫຼວງພະບາງ ກອງປະຊຸມຄັ້ງນີ້ມີຜູ້ເຂົ້າຮ່ວມຈາກພາກລັດ ແລະ ຫົວໜ່ວຍທຸລະກິດ ພາຍໃນແຂວງຫຼວງພະບາງ ທັງໝົດຈໍານວນ 50 ທ່ານ.

ທ່ານ ຈັນສະໜອນ ສີສະອາດ ຮອງຫົວໜ້າກົມສົ່ງເສີມການຄ້າ, ກະຊວງອຸດສາຫະກໍາ ແລະ ການຄ້າໄດ້ກ່າວວ່າ: ຈຸດປະສົງຂອງປະຊຸມໃນຄັ້ງນີ້ ກໍ່ເພື່ອສົ່ງເສີມຜູ້ປະກອບການຫົວໜ່ວຍໂອດອບ ແລະ ວິສາຫະກິດຂະໜາດນ້ອຍ ແລະ ກາງ SME ຢູ່ພາຍໃນແຂວງຫຼວງພະບາງ ໄດ້ຮັບຮູ້ເຖິງຄວາມໝາຍຄວາມສຳຄັນຂອງການສ້າງຍີ້ຫໍ້ (Brand) ໃຫ້ກັບສິນຄ້າຂອງຕົນເອງ. ຜູ້ປະກອບການຍັງຈະໄດ້ຮຽນຮູ້ເຂົ້າໃຈວິທີການການພັດທະນາສິນຄ້າ, ວິທີການສ້າງຍີ່ຫໍ້ໃຫ້ກັບສິນຄ້າຂອງຕົນ ເພື່ອເປັນສັນຍາລັກຂອງສິນຄ້າໃຫ້ເປັນທີ່ຮູ້ຈັກຂອງຜູ້ບໍລິໂພກ ຫລື ຜູ້ຊົມໃຊ້ທັງພາຍໃນ ແລະ ຕ່າງປະເທດ ແລະ ອີກດ້ານໜຶ່ງຈະເປັນການສ້າງຊື່ສຽງໃຫ້ກັບຍີ້ຫໍ້ (Brand) ສິນຄ້າຂອງຕົນ ນອກນັ້ນ, ຍັງຈະໄດ້ຮຽນຮູ້ການນຳໃຊ້ເຄື່ອງມືຕ່າງໆເພື່ອຊ່ວຍໃນການໂຄ ສະນາສິນຄ້າຂອງທ່ານອີກດ້ວຍ. ບົດຮຽນທີ່ນໍາມາສະເໜີ ແລະແລກປ່ຽນໃນກອງປະຊຸມຄັ້ງນີ້ມີຄື:

  1. ການພັດທະນາຍີ່ຫໍ້ທ້ອງຖິ່ນສູ່ສາກົນ.
  2. ການປັງປຸງ ແລະພັດທະນາສິນຄ້າໃຫ້ໄດ້ຮັບກາໝາຍ ODOP.
  3. ຊ່ອງທາງການເຂົ້າຮ່ວມງານວາງສະແດງສິນຄ້າທັງພາຍໃນ ແລະຕ່າງປະເທດ.
  4. ການນຳໃຊ້ອິນເຕີເນັດ ແລະເຄື່ອງມືທາງອີເລັກໂທນິກເຂົ້າໃນການພັດທະນາສິນຄ້າ.
  5. ຄວາມສຳຄັນຂອງການອອກແບບໂລໂກ້ສິນຄ້າ ແລະການຫຸ້ມຫໍ່.