ກອງປະຊຸມສັນຍາເຂດການຄ້າເສລີ ແລະ ຜົນປະໂຫຍດຂອງທຸລະກິດການຄ້າຜ່ານທາງເອເລັກໂຕຣນິກ

ໃນວັນທີ 14 ພະຈິກ 2019 ຢູ່ທີ​ໂຮງແຮມ ແລນມາກ ແມ່ຂອງ ຣີເວີໄຊ໌, ນະຄອນຫຼວງວຽງຈັນ, ກົມສົ່ງເສີມການຄ້າ ກະຊວງອຸດສາຫະກໍາ ແລະ ການຄ້າ ໄດ້ຈັດກອງປະຊຸມຫົວຂໍ້ “ສັນຍາເຂດການຄ້າເສລີ ແລະ ຜົນປະໂຫຍດຂອງທຸລະກິດການຄ້າຜ່ານທາງເອເລັກໂຕຣນິກ” ໃຫ້​ກຽດ​ເປັນປະທານຮ່ວມໂດຍ ທ່ານ ໄຊສົມເພັດ ນໍລະສິງ ຫົວໜ້າກົມສົ່ງເສີມການຄ້າ,  ທ່ານ ພັນມະນີ ຄຳພິລາວົງ ຜູ້ຈັດການໂຄງການພັດທະນາເອກະຊົນ ແລະ ວິສາຫະກິດຂະໜາດນ້ອຍ ແລະ ກາງ ໄລຍະ 2 ແລະ Mr. Damien Lam ບໍລິສັດ CEO/ Barterfli Company, ຊຶ່ງໃຫ້ກຽດຮ່ວມບັນຍາຍ ຈາກຕາງຫນ້າກົມນະໂຍບາຍການຄ້າຕ່າງປະເທດ, ກົມການນຳເຂົ້າສົ່ງອອກ, ສະພາການຄ້າ ແລະ ອຸດສາຫະກໍາແຫ່ງຊາດລາວ ແລະ ທິມງານຂອງພຣາວສະມີ. ນອກນັ້ນ, ຍັງມີບັນດາທ່ານຜູ້ຕາງຫນ້າຈາກບັນດາກົມກ່ຽວຂ້ອງພາຍໃນກະຊວງອຸດສາຫະກຳ ແລະ ການຄ້າ ແລະ ຜູ້ປະກອບການຫົວໜ່ວຍທຸລະກິດ SMEs ໃນນະຄອນຫລວງວຽງຈັນ ລວມ​ທັງ​ໝົດ 100 ທ່ານ.

ກອງ​ປະ​ຊຸມໃນຄັ້ງນີ້ດຳເນີນເປັນເວລາເຄິ່ງມື້ ໂດຍມີຈຸດປະສົງເພື່ອຊຸກ​ຍູ້​ສົ່ງ​ເສີມເຮັດໃຫ້ຜູ້ປະກອບການໃນ ສປປ ລາວ ໄດ້ມີຄວາມເຂົ້າໃຈຢ່າງເລິກເຊີ່ງກ່ຽວກັບເຂດການຄ້າເສລີອາຊຽນ (FTA), ຮູ້ໄດ້ປະໂຫຍດຈາກການຄ້າເສລີອາຊຽນ (FTA), ການຊື້-ຂາຍຜ່ານທາງເອເລັກໂຕຣນິກ, ການຊອກຫາຂໍ້ມູນກ່ຽວກັບເຂດການຄ້າເສລີອາຊຽນ ລະບຽບແຫລ່ງກຳເນີດສິນຄ້າສຳຫລັບເຂດການຄ້າເສລີຕ່າງໆ, ການ​ເຮັດ​ການ​ຄ້າ​ຜ່ານ​ www.plaosme.com ໂດຍສະເພາະການຊອກຫາຂໍ້ມູນຜ່ານລະຫັດພາສີ ( HSCode ), ໄດ້ເຜີຍແຜ່ຮ່າງດຳລັດການຄ້າຜ່ານທາງເອເລັກໂຕຣນິກໃຫ້ແກ່ຜູ້ປະກອບການໄດ້ຮັບຮູ້ຫລາຍຂຶ້ນ.

ກອງປະຊຸມໃດ້ດຳເນີນໄປຢ່າງຟົດຟື້ນ, ໄດ້ລົງເລິກແບບວິຊາການໂດຍມີການຕັ້ງຄຳຖາມເຈາະຈິ້ມຫລາຍບັນຫາກ່ຽວກັບກອງທຶນ ແລະ ການສົ່ງອອກ ຊຶ່ງໄດ້ແລກປ່ຽນຄຳຄິດເຫັນກັນຢ່າງກົງໄປກົງມາ ແລະ ມີການປຶກສາຫາລືກ່ຽວກັບບັນຫາທີ່ທາງຫົວຫນ່ວຍທຸລະກິດໄດ້ປະສົບພົບພໍ້ໃນການດຳເນີນທຸລະກິດ ໂດຍສະເພາະກ່ຽວກັບການໃຊ້ສິດທິປະໂຫຍດທາງອັດຕາພາສີທີ່ ສປປ ລາວໄດ້ຮັບຈາກບັນດາປະເທດຮ່ວມພາຄີ ແລະ ກອງປະຊຸມໄດ້ຈົບລົງດ້ວຍຫມາກຜົນຕາມເປົ້າໝາຍ.